समाजवादी ट्रेड युनियन महासंघ गण्डकी प्रदेश समायाेजन
पोखरा । ४ माघ २०७६ । नेकपा र नेपाली कांग्रेसका ५१ जना कार्यकर्ताहरु पार्टी परित्याग गरी शनिबार समाजवादी पार्टीमा प्रवेश गरेका छन् ।
शनिबार पोखराको राष्ट्र बैंक चोकस्थित मुक्तिनाथ लेकाली होटलमा आयोजित ‘समाजवादी ट्रेड युनियन महासंघ नेपाल र समाजवादी निर्माण मजदुर संघ नेपाल गण्डकी प्रदेशको एकता तथा समायोजन कार्यक्रम’मा उनीहरु समाजवादीमा प्रवेश गरेका हुन् ।
पार्टी प्रवेश गर्नेहरु नेकपा र कांग्रेसका मजदुर कार्यकर्ता हुन् । समाजवादी पार्टीका महासचिव गंगानारायण श्रेष्ठले टीका लगाएर उनीहरुलाई पार्टीमा स्वागत गरेका छन् ।
सो अवसरमा समाजवादी ट्रेड युनियन महासंघ गण्डकी प्रदेश समितिको समायोजन गरिएको छ ।
महासंघका महासचिव डिबी सरोज राईकाअनुसार समाजवादी ट्रेड युनियन महासंघ गण्डकी प्रदेश अध्यक्षमा शिवबहादुर अधिकारी चयन भएका छन् । गण्डकी प्रदेश समिति ३५ सदस्यीय छ ।
संघीय समाजवादी फोरम नेपाल र नयाँ शक्ति पार्टी नेपालनिकट दुई मजदुर संगठनबीच समायोजन गरिएको हो ।
यसैगरी ट्रेड युनियन महासंघको घटकको रुपमा रहेको समाजवादी निर्माण मजदुुर संघ गण्डकी प्रदेश समिति समेत समायोजन गरिएको छ ।
विशालसिंह ठकुरीको अध्यक्षतामा २१ सदस्यीय प्रदेश समिति घोषणा गरिएको छ ।
सो अवसरमा समाजवादी पार्टीका महासचिव श्रेष्ठले आफ्नाे पार्टीको विचार र कार्यक्रमबारे प्रकाश पारेका थिए । उनले मजदुरहरु कुनै पनि दलको मेरुदण्ड भएको समेत बताए ।
कार्यक्रममा समाजवादी पार्टी गण्डकी प्रदेशका इन्चार्ज गणेशमान गुरुङ, समाजवादी पार्टीका केन्द्रीय सदस्य लालध्वज नेम्वाङ, देवी सुवेदीलगायत नेता सहभागी थिए ।
समाजवादी ट्रेड युनियन महासंघका उपाध्यक्ष बिष्णुप्रसाद पौडेलको अध्यक्षतामा भएकाे कार्यक्रमकाे सञ्चालन रिम बस्यालले गरेका थिए ।
News source: sarbajanik.com